Қырғызстанның ұлттық қауіпсіздік жөніндегі мемлекеттік комитеті Жалалабадта "Хизб ут-Тахрир" ұйымына қатысы бар деген күдікпен 22 адам ұсталғанын хабарлады. Бұл жөнінде Азаттықтың Қырғыз қызметі жазды. Елде аталған ұйымның қызметіне тыйым салынған.
Ведомствоның хабарлауынша, осылайша бірнеше жыл бойы халық арасында "деструктивті идеологияны насихаттаумен" айналысқан "Хизб ут-Тахрирдың" ірі желісі жойылған".
Құқық қорғау органдары көп экстремистік әдебиет, компьютерлік, көшірме техникаларды, дрондарды тәркілегінін айтты. ҰҚМК-ның түсіндіруінше, дронды күдіктілер "құқық қорғау органдарының әрекеттерін бақылау үшін қолданған" болуы мүмкін.
Күдіктілер тергеу изоляторына қамалған.
Азаттықтың Қырғыз қызметінің жазуынша, 2024 жылы Жалалабад облысы Бек-Абад ауылында белгісіз біреулер екі мектеп пен әкімдікте ілініп тұрған Қырғызстан туын өртеп, олардың орнына араб тілінде жазылған ақ матаны ілген. ҰҚМК сол кезде "Хизб ут-Тахрирға" қатысы бар деген күдікпен аталған ауылдың алты тұрғынын ұстағанын хабарлаған. Олардың ту өртеуге қатысы бар, жоғы белгісіз.
Қырғызстанда "Хизб ут-Тахрир" қызметіне 2003 жылғы сот шешімімен тыйым салынған.
ПІКІРЛЕР